शिक्षणासाठी ‘मराठी की इंग्रजी’ यापैकी कशाची निवड आपण करायची हा प्रत्येकाचा वैयक्तिक मुद्दा आहे, मात्र इंटरनेट विश्वात मराठीचा आणि एकुणातच भारतीय भाषांचा टक्का झपाट्याने वाढत आहे हे निश्चित. येत्या काही वर्षात भारतीय इंटरनेटचे अवकाश स्थानिक भाषांनी व्यापलेले असेल हेच गुगल आणि केपीएमजीच्या या अहवालाचे सार आहे. वास्तविक हा अभ्यास आणि त्यातील निष्कर्ष जवळपास पाच वर्षांपूर्वीचे आहेत. आज आपण २०२२ मध्ये आहोत. म्हणजेच अहवालात नोंदवलेल्या बऱ्याच बाबी आज प्रत्यक्षात आल्या असणार आहेत. २०१८ साली ‘रिलायन्स जिओ’ मुळे भारतीय ऑनलाईन जगतामध्ये एक मोठी क्रांती झाली. त्यानंतर कोरोना काळात सर्वच व्यवहार ऑनलाईन झाले. तुम्ही पुणे-मुंबई सारख्या मोठ्या शहरात राहता की लहान गावात आता इंटरनेट आणि ऑनलाईन असणे हा जीवनाचा अविभाज्य भाग बनला आहे. या सगळ्या माहितीचा एका व्यावसायिकांसाठी असलेला अर्थ सरळ आहे, जर एखाद्याला इंटरनेटचा वापर करून आपल्या ग्राहकांना काही सांगायचे असेल तर त्या-त्या राज्यातील भाषेला प्रथम स्थान दिले पाहिजे. यामुळे व्यवसायवृद्धी, ग्राहकांचे समाधान या बाबी साध्य होतीलच आणि मायबोलीचा प्रवाह अधिक विस्तारायला आपलाही खारीचा हातभार लागेल हे निश्चित. 

………… 

© सदानंद कुलकर्णी 
संचालक: डिजिटल कॅनव्हास

Copyright 2022 All rights reserved