पर्यावरण हाच जीवनाचा मूळ आधार आहे. मानवाने पर्यावरणाचे संवर्धन आणि संरक्षण केले तरच पर्यावरण आपले करेल हा निसर्गाचा मुलभूत नियम आहे. मानवाची गेल्या काही दशकातील वाटचाल पहिली तर हा नियम धाब्यावर बसवून मानवजात स्वतःचे आणि येणाऱ्या पिढ्यांचे अतोनात नुकसान करीत आहे असे दिसते. प्रबोधनातूनच समाज परिवर्तन होते हे भारतीय संत महात्म्यांनी त्यांच्या आचरणातून वारंवार सिध्द करून दाखवले आहे. शेकडो वर्षांची परंपरा असलेली देहू-आळंदी ते पंढरपूर वारी हे याचे मूर्तिमंत उदाहरण आहे. शेकडो वर्षे पर्यावरणस्नेही असलेली वारी गेल्या काही वर्षात बरीच बदलेलेली आहे. प्लास्टिक आणि थर्माकोल डिशेस आणि प्लेट्स यांचा अनिर्बंध वापर हा ठळक आणि विघातक बदल. वारीच्या दरम्यान आणि वर्षभर वेगवेगळ्या निमित्ताने होत असलेल्या प्लास्टिक, थर्माकोल यांच्या प्लेट्स, डिशेस यांच्या प्रचंड वापरामुळे शेती, जमीन, पाणी आणि पर्यावरण साखळी यांचे दीर्घकालीन नुकसान होते आहे. आजवर झालेली हानी भरून काढण्यासाठीच शेकडो वर्षे लागतील एवढे हे भीषण संकट आहे. 

जे-जे अमंगल, अनिष्ट त्यावर वार करून, त्याच्या जोखडातून स्वतः मुक्त होणे आणि त्यासाठी समाजाचे प्रबोधन करणे हे कार्य वारकरी संप्रदायाने शेकडो वर्षे केले आहेच. सांप्रतकाळी प्लास्टिक आणि थर्माकोल प्लेट्स, डिशेस यांच्या रूपाने शेकडो वर्षे जिवंत राहणारा भस्मासुर वारीमध्ये शिरला आहे. दिवसें-दिवस तो आपले पाश आवळत चालला आहे. आपले आणि येणाऱ्या आपल्याच पिढ्यांचे या भस्मासुरापासून रक्षण करण्यासाठी आणि होणारे नुकसान टाळण्यासाठी वारकरी आणि सर्वसामान्य नागरिक यांचे प्रबोधन संतानी घालून दिलेल्या मार्गाने करणे हाच एकमेव रामबाण उपाय आहे.